- Nánar
-
Flokkur: Fréttir
-
Skrifað þann Föstudagur, júní 26 2009 01:09
-
Skrifað af Super User
Þessa dagana iðar allt af lífi í
hesthúsahverfinu í Mosfellsbæ en þar fer fram Íslandsmót barna, unglinga og
ungmenna í hestaíþróttum sem væntanlega hefur ekki farið fram hjá neinum. Fyrsti
keppnisdagur af fjórum er nú liðinn en mótið hófst með keppni í fjórgangi. Allt
fór fram eins og best verður á kosið, keppendur riðu prúðmannlega og áhorfendur
stóðu sig vel í klappliðinu á milli þess sem þeir úðuðu í sig dýrindis
veitingum. Veðrið var keppendum og áhorfendum nokkuð hliðhollt því þrátt fyrir
að það rigndi af og til var hlýtt í lofti og lítill vindur.
Margar stórgóðar sýningar sáust
og gáfu tilþrif hinna ungu knapa, eldri knöpum ekkert eftir. Glæsilegustu
sýningu dagsins og hæstu einkunnina, hvorki meira né minna en 7,30, átti Rakel
Nathalie Kristinsdóttir á stóðhestinum Vígari frá Skarði. Vígar er greinilega í
feiknaformi og verður erfitt að toppa þau Rakel í úrslitunum á sunnudag. En það
er aldrei neitt gefið eftir og enginn öruggur með sæti fyrr en spurt hefur verið
að leikslokum.
Föstudaginn 26. júní hefst
keppni með Fimi barna og unglinga kl. 10. Eftir hádegi tekur svo við keppni í
tölti og má vænta þess að ekki verði minna um tilþrif þar en í fjórganginum. Við
bjóðum alla hestaunnendur velkomna í áhorfendabrekkuna í Mosfellsbænum og lofum
frábærri skemmtun næstu þrjá dagana.
Vígsluhátíðin nálgast óðum og enn er mikið af sjálfboðaliðum að störfum bæði við frágang innanhúss og einnig við undirbúning hátíðarinnar. Uppskera vinnunnar er að sjálfsögðu hin frábæra aðstaða sem við Harðarmenn og -konur fáum til afnota, við áhugamál okkar allra og á eftir að auka mjög á gæði vinnu við hesta okkar sem og við kennslu fyrir alla, bæði börn og fullorðna.
