- Nánar
-
Flokkur: Fréttir
-
Skrifað þann Fimmtudagur, apríl 09 2026 20:09
-
Skrifað af Sonja
Námskeið fyrir börn og polla undir 12 ára!
Almennt reiðnámskeið fyrir polla og börn þar sem markmiðið er að bæta jafnvægi og grunnstjórnun í gegnum ýmsa leiki og þrautir. Hjá minna vönum pollum sem eru að stíga sín fyrstu skref í hestamennsku eru foreldrar með og teyma undir börnunum. Hjá meira vönu pollunum er markmiðið að fara dýpra samspil hests og knapa og ná meiri tökum á undirstöðu atriðum í reiðmennsku í gegnum ýmsar skemmtilegar æfingar.
Námskeið fyrir áhugasama krakka sem vilja öðlast meira jafnvægi, skilning og þekkingu á almennri þjálfun hesta. Farið verður yfir ýmis öryggisatriði og umgengni við hestinn, hvernig á að ná betri stjórn og samspili við hestinn og lögð áhersla á yfirvegaðar og léttar ábendingar. Í lok þessa námskeiðs ættu nemendur að vera komnir með grunnskilning í reiðmennsku, þekkja helstu gangtegundir og hvernig þjálfun getur verið skemmtileg bæði fyrir hest og knapa.
Námskeiðið er fjögur skipti og er kennt í Blíðubakkahöll og úti í hvíta gerði ef veður leyfir. Kennt er einu sinni í viku á fimmtudögum og krakkar mæta með eigin hest og búnað. Hefst 16.apríl!
Hóparnir eru eftirfarandi:
Pollar teymdir
Pollar ríða sjálfir
Börn
Kennari raðar í hópa eftir skráningu!
Kennari: Sóllilja Baltasarsdóttir
Apríl: 16. / 30.
Maí: 7. / 21.
Skráning inn á abler.io/shop/hfhordur
Verð pollar: 2500kr
Verð börn : 5000kr
- Nánar
-
Flokkur: Fréttir
-
Skrifað þann Mánudagur, mars 23 2026 11:45
-
Skrifað af Sonja
Árshátíð Harðar fór fram laugardaginn 14.mars síðastliðinn. Hátíðin tókst að venju frábærlega, með góðum mat og dansi sem dunaði inn í nóttina, Harðarfélagar skemmtu sér sérlega vel saman nú sem endranær.
Á árshátíð Harðar eru veittar viðurkenningar fyrir kynbótahross og íþróttafólk félagsins.
Íþróttakona Harðar 2025 er Aðalheiður Anna Guðjónsdóttir sem vann það einstaka afrek að verða heimsmeistari í slaktaumatölti T2 fyrst Íslendinga á HM síðasta sumar með langhæstu einkunn í úrslitunum og hæstu einkunn heimsmeistaramótsins . Auk þess átti hún góðu gengi að fagna á mótum ársins innanlands, varð meðal annars sigurvegari fjórgangs í Meistaradeildinni. Aðalheiður var í toppsætunum á öllum þeim mótum sem hún keppti á og var einnig tilnefnd til íþróttaknapa og knapa ársins á Uppskeruhátíð hestamanna 2025. Hún á sæti í landsliði Íslands í hestaíþróttum.
Auk þess að standa sig sérlega vel í keppni þá sýndi hún 30 kynbótahross á árinu með frábærum árangri.
Fyrir hönd Aðalheiðar tók Guðrún Astrid Elvarsdóttir við verðlaunum.
Íþróttakarl Harðar 2025 er Kristinn Karl Garðarsson sem hefur verið ötull keppandi fyrir Hörð og náð góðum árangri á fjölda móta, bæði innan félagsins og á opnum mótum.
Hann átti góðu gengi að fagna á Reykjavíkurmeistaramóti WR síðasta vor þar sem hann keppti í fjölda greina sem og á áhugamannamóti Íslands, opnu íþróttamóti í Spretti og Mosfellsbæjarmeistaramóti í Herði ásamt þátttöku í ýmsum fleiri mótum innan félags og utan, bæði íþrótta og gæðingakeppnum. Hann var í liði Nýsmíði í áhugamannadeild Spretts, Samskipadeildinni og náði góðum árangri með liði sínu.
Hæst dæmda kynbótahross sýnt á árinu 2025 ræktað af Harðarfélaga er glæsi hryssan Eik frá Meðalfelli 6 vetra gömul.
Faðir hennar er Sproti frá Innri-Skeljabrekku og móðir Nípa frá Meðalfelli MF: Orri frá Þúfu (móðir hans undan Adam frá Meðalfelli)
Nípa sjálf hlaut 9,05 fyrir hæfileika og 8,70 í aðaleinkun
Ræktendur Eikar eru Sigurbjörg Ólafsdóttir og Sigurþór Gíslason
Hún hlaut fyrir sköpulag 8,22 (hæst 9 fyrir höfuð og háls og herðar) og fyrir hæfileika hlaut hún 8,76 þar sem hæst ber 9 fyrir tölt, brokk, samstarfsvilja, fegurð í reið og fet
Aðaleinkun 8,57
Eik var sýnd á vorsýningu á Hólum af Agnari Þór Magnússyni
Að auki var veitt sérstök viðurkenning fyrir hross ræktað af Harðarfélaga sem náði sérstökum árangri árið 2025.
Hulinn IS2018157298 frá Breiðstöðum
Faðir: Kveikur frá Stangarlæk
Móðir: Díana frá Breiðstöðum
Hæsta dóm hlaut hann á LM 2024 og var það ár verðlaunaður sem hæst dæmda kynbótahross Harðar.
Sköpulag 8,34
Hæfileikar 8,75
Aðaleinkun: 8,61
Hulinn var sýndur af Aðalheiði Önnu Guðjónsdóttur sem tamdi hann og þjálfaði alla tíð.
Saman hófu Hulinn og Aðalheiður sitt fyrsta keppnistímabil á seinasta ári og náðu þeim einstaka árangri að verða heimsmeistarar í slaktaumatölti T2 á HM í Sviss með aðaleinkunina 8,92, urðu þau fyrst allra til að vinna þann titil fyrir hönd Íslendinga.
Sannarlega ótrúlegur árangur hjá svo ungum hesti með litla keppnisreynslu, það lýsir hans upplagi og geðslagi vel.
Óskum Aðalheiði innilega til hamingju með sinn frábæra árangur á árinu og einnig Guðrúnu Astrid Elvarsdóttur og Stefáni Friðrik Jónssyni fyrir að rækta svo magnaðan hest.
- Nánar
-
Flokkur: Fréttir
-
Skrifað þann Miðvikudagur, apríl 08 2026 20:56
-
Skrifað af Sonja
Eins og undanfarin ár geta skuldlausir félagar sótt um beit á heimasíðu félagsins undir hnappnum „Sækja um beit.“
Allir sem vilja fá beitarhólf þurfa að sækja um, líka þeir sem voru með beit í fyrra eða undafarin ár.
Kynnið ykkur VANDLEGA úthlutunarreglurnar á heimasíðunni áður en þið fyllið út umsókn, reglurnar hafa verið endurskoðaðar í ár eins og undanfarin ár og þær aðlagaðar:
https://hordur.is/index.php/felagid/beitarholf
Umsóknir verða að berast fyrir 1. mai n. k.
Eindagi á greiðslu fyrir beitina verður 1.júní. Sé ekki greitt fyrir þann tíma verður hólfinu úthlutað öðrum.
Umsóknarform má finna hér:
https://hordur.is/index.php/saekja-um-beit
- Nánar
-
Flokkur: Fréttir
-
Skrifað þann Miðvikudagur, mars 18 2026 20:16
-
Skrifað af Sonja
Umsóknir um beit á vegum Harðar – til upplýsingar
Mosfellsbær vinnur um þessar mundir að því að endurnýja samning við hestamannafélagið Hörð um nýtingu beitarhólfa innan bæjarmarkanna, kortleggja hólfin betur og uppfæra reglur.
Af þeim sökum verður einhver töf á að við getum opnað fyrir umsóknir um beit, en það verður vonandi hægt að gera innan fárra vikna. Mosfellsbær vill hafa nýjan samning í höfn áður en umsóknarferlið hefst.
Kveðja, Stjórnin
