Nánar

Skrifað þann Mánudagur, febrúar 09 2026 11:20

Skrifað af Sonja

Kæru Harðafélagar

Nú ríður á að við leggjum öll hönd á plóginn og leggjum inn athugasemdir í skipulagsgátt, vegna fyrirhugaðrar stækkunar Hlíðavallar til austurs. Þessi tillaga að breytingum og stækkun dregur verulega úr öryggi okkar hestamann á þessari reiðleið út á Blikastaðanes. Hér fyrir neðan er hugmynd af umsögn sem hægt er að nota að hluta eða að öllu leyti og/eða setja inn ykkar eigin athugasemdir.

Linkur á málið og gögn um það á skipulagsgátt er hér: Stækkun og endurhönnun íþróttasvæðis að austurhluta Hlíðavallar

Það þarf að skruna svolítið niður vefsíðuna og finna þennan hnapp til að leggja inn athugasemdir (hægt að lesa líka það sem kemur inn jafn óðum):

Við hvetjum ykkur öll að leggja inn athugasemdir og tryggja þannig styrka rödd okkar Harðarfélaga í þessu mikilvæga máli.

Kveðja

Jón Geir Sigurbjörnsson

Formaður Harðar

Hugmynd að umsögn:

Athugasemd vegna stækkunar Hlíðavallar – áhersla á öryggi

Ég geri alvarlegar athugasemdir við fyrirliggjandi tillögu um stækkun Hlíðavallar til austurs, þar sem hún gengur gegn grundvallar öryggi þeirra sem nýta reiðveginn sem liggur um svæðið.

Reiðvegurinn er hluti af íþróttamannvirkjum hestamanna og er í dag ein fjölfarnasta reiðleið Mosfellsbæjar. Leiðin er notuð allt árið af börnum, ungmennum, fullorðnum, eldri borgurum, nýliðum og reyndum reiðmönnum, bæði til þjálfunar, tamninga, útreiða og sem tenging milli hesthúsahverfa og annarra sveitarfélaga.

Samkvæmt tillögunni er gert ráð fyrir að golfbrautir liggi beggja vegna reiðvegarins á löngum kafla. Þetta leiðir til:

• aukinnar hættu vegna golfbolta, högghljóða og ófyrirsjáanlegra aðstæðna,
• fjölgunar þverana þar sem golfumferð fer yfir reiðveg,
• aukins áreitis sem getur valdið ótta og viðbragða hjá hestum,
• almennt verri aðstæðna fyrir örugga ríðandi umferð.

Þrátt fyrir að markmið skipulagsins séu sögð vera aukið öryggi er ekki sýnt fram á hvernig öryggi hestamanna sé tryggt. Þvert á móti er ljóst að tillagan eykur hættu á slysum og rýrir gæði reiðleiðarinnar verulega.

Það liggur fyrir raunhæfur og framkvæmanlegur valkostur sem felst í því að færa reiðveginn norður fyrir áætlaða stækkun vallarins. Slík lausn:

• aðskilur ólíkar íþróttir með skýrum hætti,
• dregur verulega úr slysahættu,
• er í samræmi við áherslur um öryggi, samlegð og útivist fyrir alla,
• er í takt við fyrri tillögur og umsagnir hestamanna.

Ég hvet Mosfellsbæ eindregið til að endurskoða tillöguna með öryggi ríðandi umferðar að leiðarljósi og vinna málið áfram í raunverulegu samráði við hestamenn.

Útivistarsvæðið á að vera fyrir alla – en það verður það ekki með þessum breytingum sem eru á kostnað öryggis barna og annarra sem stunda hestamennsku.

Virðingarfyllst,
[nafn]
[félagsmaður / iðkandi / foreldri reiðskólanema]

Nánar

Skrifað þann Föstudagur, febrúar 06 2026 09:19

Skrifað af Sonja

Ætlað krökkum í yngri flokkum, undir 21 árs.

ATH. Stóra höllin verður LOKUÐ á þessum tíma en Blíðubakkahöllin verður OPIN á þessum tíma fyrir félagsmenn svo þetta ætti ekki að valda miklum óþægindum

Næsta mánudag verður haldið stutt æfingamót fyrir nemendur á keppnisnámskeiði Harðar. Þetta er liður í námskeiðinu sem stuðlar að því að auka á keppnisreynslu nemenda! Við viljum bjóða krökkum í félaginu sem eru ekki á keppnisnámskeiðinu að vera með gegn vægu gjaldi

Skráning fyrir nemendur á keppnisnámskeiðinu er innifalið í námskeiðinu! Þessi skráning er ætluð þeim sem eru EKKI skráðir á keppnisnámskeiðið!

Ath. einungis ein skráning á mann! (Einn hestur og knapi (par) í eina grein)

2-3 saman inn á, tveir dómarar dæma, gefa tölur og umsögn!

Hægt að skrá í fjórgang (V2), fimmgang (F2) eða tölt (T3). Verð fyrir knapa ekki á keppnisnámskeiðinu: 1000kr

Ráslistar koma inn á abler á sunnudaginn!

Skráning inn á abler.io/shop/hfhordur

Senda nafn á knapa, hesti, keppnisgrein og upp á hvora hönd knapi ætlar að ríða fyrir hádegi sunnudaginn 8.febrúar! Senda á Thelmu Rut á facebook eða This email address is being protected from spambots. You need JavaScript enabled to view it.

Nánar

Skrifað þann Mánudagur, febrúar 02 2026 08:51

Skrifað af Sonja

Til félaga í Hestamannafélaginu Herði

Við bjóðum uppá heyefnagreiningar fyrir hestamenn. Tvennskonar, minni greining kostar 6080- kr án vsk og stærri greining kostar 12239.- kr án vsk . Minni greiningin er með orkuefnagreiningum (Meltanleiki, prótein, tréni, sykur, hestafóðureiningar) og útreikningum á heygjöf á dag pr hest útfrá ykkar heyi. Í stærri greiningunni bætist við helstu stein- og snefilefni.

Þið setjið heyið í poka (100-200 gr hvert sýni) fer eftir hversu þurrt heyið er. Merkið með nafni, heimilisfangi, kt og tölvupóstfangi og hvort þið viljið minni eða stærri greiningu.

Ég kem til ykkar á sunnudaginn 8. febrúar kl. 16:40 og verð við Reiðhöllina ykkar til kl 17:10. Verð á gráum Renault Koleos

Ef ykkur vantar nánari upplýsingar þá er síminn hjá mér 6612629 og tölvupóstfang This email address is being protected from spambots. You need JavaScript enabled to view it.

Meðfylgjandi er niðurstöðublað sem sýnir niðurstöður í stærri greiningu og einnig viðmið.

Nánar

Skrifað þann Fimmtudagur, janúar 29 2026 13:36

Skrifað af Sonja

Einkatímar með reiðkennaranum Antoni Páli Níelssyni
Miðvikudaginn 4.febrúar og fimmtudaginn 5.febrúar
Miðvikudaginn 18.febrúar og fimmtudaginn 19.febrúar
Á miðvikudögum eru tímar frá 8:30-15:30
Á fimmtudögum er kennt frá 12:30-15:30
Tona þarf vart að kynna en hann kenndi við Hólaskóla í fjölda mörg ár auk þess að sinna reiðkennslu víða um heim og rækta hross. Anton Páll hefur verið einn af þjálfurum íslenska landsliðsins í hestaíþróttum sem og nokkrum erlendum landsliðum, t.d. því sænska og austurríska.
Anton Páll er þekktur fyrir einfalda, hreinskilna, hestvæna og mjög árangursríka nálgun í reiðkennslu sinni.
Tímarnir eru 45 mínútna einkatímar sniðnir að hverjum og einum knapa og eru kenndir í reiðhöll Harðar.
Takmarkaður fjöldi plássa í boði svo um að gera að vera fljótur að skrá sig!
Skráning hefst í kvöld fimmtudaginn 29.janúar klukkan 20:00 á abler.io/shop/hfhordur
Aldurstakmark: 12 ára og eldri
Verð einn tími: 17.500