Hestamannafélagið Hörður

Sóttvarnarreglur

Nánar: Skrifað þann Föstudagur, janúar 14 2022 19:45; Skrifað af Sonja

Það hefur líklega ekki farið framhjá neinum að samkomutakmarkanir verða hertar á miðnætti.

Þar sem áhorfendur að keppni og æfingum eru bannaðir þurfum við að loka áhorfendapöllunum í reiðhöllinni. Það verður áfram fullt af spritti á staðnum og biðjum við alla að nota það þegar td er verið að opna hurðina, nota skítagafal eða brokkspírur eða annað dót.

Það er ekki grímuskylda í reiðhöllinni, en gætt skal að fjarlægðarmörkum eins og frekast er unnt.

Minnum á að ef höllin er hálf vegna kennslu mega ekki vera fleiri en 6 knapar í fremri helmingnum og ef hún er öll opin eru ekki fleiri en 12 manns inni.

Við minnum á mikilvægi þess að halda áfram að sinna persónulegum sóttvörnum vel og að sjálfsögðu fara ekki í reiðhöllina með covid- eða flensulík einkenni, fara bara beint í test og kynna sér reglur um sóttkví og smitgát 😊

Fatlaðra starfið

Nánar: Skrifað þann Fimmtudagur, janúar 13 2022 12:07; Skrifað af Sonja

Kæru félagar.

Flestir vita að reiðnámskeið fyrir fatlaða í Herði er öflugt og mikilvæg starf sem er unnið hér hjá okkur og okkur þykir öllum vænt um.
Samt er rétt að árétta upplýsingar um hvernig þetta snýr við okkur i félaginu sér i lagi hvað varðar aðstöðu.

Þessi reiðnámskeið eru með hálfa reiðhöll á leigu fyrir sig mánudaga til fimmtudaga milli klukkan 14.45-15.45 og á laugardögum 10.30-11.30.
Það innifelur að þau nota aðstöðuna í anddyri reiðhallarinnar til að koma nemendum á og af baki og allt í kringum það. Þau nota stóru hurðina í byrjun tímans þegar fólk er að koma og svo aftur í lok tímans þegar allir fara.
Í reiðsalnum í höllinni sjálfri eru þau í innri helmingnum um 15.00-15.30 (laugardag 10.45-11.15) en stundum (oftar þegar fer að vora) fara þau út. Þess vegna finnst okkur ekki ástæða til að loka hálfri höllinni fyrir þess starfssemi í þennan stutta tíma hvern dag heldur biðjum við alla félaga að sýna þessum starfi virðingu og tillitsemi. Þeirra viðvera í reiðhöllinni hefur ákveðinn forgang.

Á miðvikudögum (þegar Keppnisnámskeið barna er á sama tíma) og á laugardögum (þegar námskeið er á sama tíma) viljum við samt hafa opið inn í höll fyrir aðra. Fatlaðastarfið hefur þá verið í fremri hluta og aðrir beðnir að vinna kannski í rólegri kantinum sem koma inn að þjálfa.

Okkur langar að hafa þetta áfram svona, frekar en að loka alveg fyrir almenning þegar námskeið eru í innri hluta, það hefur gengið vel undanfarin ár. En það krefst þess að aðrir reiðmenn séu meðvitaðir um hvað er í gangi í reiðhöllinni á þessum tíma og sýni sérstaka aðgát og tillitssemi. Þetta er ekki langur tími í einu.

Allt tímaplan reiðhallarinnar er á heimasíðu Harðar.

Hægt er að senda ábendingar undir hnappnum Ábending/tillaga hægra megin á heimasíðunni líka.

Þökkum fyrir tillitssemina og skilninginn.

Frestun Smalamót

Nánar: Skrifað þann Þriðjudagur, janúar 11 2022 13:11; Skrifað af Sonja

Í ljósi aðstæðna í samfélaginu höfum við ákveðið að fresta fyrirætluðu móti núna á föstudaginn, Smalamót FMos og Glasareið. Vonumst til að geta komið því aftur á dagskrá við fyrsta tækifæri.

Kveðja

Mótarnefnd Harðar.

Frestun Þrígang FMOS

Nánar: Skrifað þann Mánudagur, janúar 03 2022 20:40; Skrifað af Sonja

Í ljósi aðstæðna í samfélaginu höfum við ákveðið að fresta fyrirætluðu móti núna á föstudaginn, Þrígangur FMos og Glasareið.
Vonumst til að geta komið því aftur á dagskrá við fyrsta tækifæri.

Kveðja Mótarnefnd Harðar.