Nánar

Skrifað þann Þriðjudagur, apríl 10 2018 15:05

Skrifað af Sonja

Atvinnustarfsemi á Harðarsvæðinu

Í sívaxandi mæli hafa aukist kröfur okkar hestamanna um ýmsa þjónustu tengda sportinu.  Þar á meðal er flutningur á hrossum, ýmist á eigin kerrum eða með hestaflutningabílum.  Kerrustæðið fyrir norðan reiðhöllina var nýlega stækkað, en til þess að koma „atvinnu“kerrunum fyrir, þyrftum við að stækka það enn frekar.  Það kostar peninga og spurning um hver borgar.  Í bígerð er að ganga betur frá og afmarka kerrustæðin og leigja þau síðan út.  Þannig gæti leigutaki alltaf gengið að sínu kerrustæði.  Óformlegt mat er að þarna gæti verið stæði fyrir allt að 50 kerrur.

Sama gildir um rúllur og bagga, en heysalar hafa sumir verið með birgðir á svæðinu og reyndar líka utan þess svæðis sem hestamannafélagið hefur til umráða.  „Gamla“ svæðið við austurenda hverfisins var utan við félagssvæði Harðar og auk þess á verndarsvæði Varmár.  Mosfellsbær bað okkur því um að fjarlægja rúllurnar og til bráðabirgða fundum við nýjan stað vestan við gamla hringvöllinn.  Vegna kvartana gerði bærinn einnig athugasemdir við þá staðsetningu, en sú staðsetning var þó innan okkar svæðis.  Hugmynd stjórnarinnar var að prófa þetta svæði og ef vel reyndist að loka því af með mön allan hringinn og gróðursetja í mönina.  Leyfa ekki baggastæður sem væru hærri en sem möninni næmi.  Loka síðan svæðið af með hliði og leigja út stæði fyrir heybirgja.  Leigan stæði undir kostnaði við svæðið.  Það verður síðan alltaf sú lágmarkskrafa gerð að þeir sem nýta stæðið gangi vel um og hirði upp plast og annað rusl. 

Svo er það hin hliðin.  Á hestamannafélagið að þurfa að bjóða upp á aðstöðu fyrir atvinnurekstur.  Í rauninni er stórt spurt, því ef allir þeir sem þjónusta okkur með hestaflutninga, heysölu og tæmingu á skítaþróm, þyrftu og fengju aðstöðu fyrir birgðir og tæki, væri lítið pláss eftir fyrir annað.

Nk laugardag frá kl 9 – 13. verður stefnumótunarfundur okkar Harðarmanna í Harðarbóli. Þar gefst öllum félagsmönnum tækifæri á að láta rödd sína og skoðun hljóma.  Hvet ég alla félagsmenn til að mæta á fundinn.

kv

HákonH

Nánar

Skrifað þann Þriðjudagur, apríl 03 2018 16:23

Skrifað af Super User

Takið daginn frá

Kæru Harðarfélagar

Laugardaginn 14. apríl nk ætlum við að móta stefnu hestamannafélagsins Harðar til næstu ára.  Runólfur Smári Steinþórsson prófessor og hestamaður ætlar að leiða stefnumótunina.

Hvar og hvernig sjáum við hestamannafélagið Hörð á næstu 20 árum?

 Við ætlum að leggja áherslu á þrjá þætti:

1. Skipulagsmál (uppbygging svæðisins og frekari landvinninga)
2. Umhverfismál (beitarmál, rekstrarmál, samspil byggðar og íbúahverfis, nýjar reiðleiðir o.fl.)
3. Innra starf félagsins (fyrirmyndarfélag, kennsla og keppni, upplýsingar o.fl.)

Fundurinn verður í Harðarbóli og byrjar kl 9 og stendur til kl 13.  Fyrst verður stutt kynning á verkefninu, en síðan verður þátttakendum skipt upp í hópa eftir áhuga hvers og eins. 

Að lokum verða umræður hvers hóps kynntar og tillögum vísað til stjórnar til frekari úrvinnslu.

Hvetjum alla Harðarfélaga til að mæta.  Því fleiri sjónarmið - því betra.

Nánar

Skrifað þann Sunnudagur, apríl 01 2018 20:00

Skrifað af Super User

Hópreið í Gunnunes á morgun 2. apríl. Hnakkur kl 13.15. Lilla fararstjóri. Allir velkomnir.

Nánar

Skrifað þann Miðvikudagur, mars 21 2018 20:34

Skrifað af Sonja

Fyrir um það bil tveimur árum var blásið til leiks á nýjum vettvangi Hestamannafélagsins Harðar þar sem eldri félagar voru boðaðir á samkomu að morgni dags í súpu og myndasýningu. Mæting var vonum framar, á milli 50 og 60 manns og kom glöggt í ljós að mannskapurinn hafði gaman að því að hittast og rifja saman upp liðnar stundir á vettvangi hestamennskunnar. Þótti því full ástæða til að hafa þar framhald á og var þá um vorið efnt til sameiginlegs útreiðartúrs sem endaði með grillveislu í Harðarbóli félagsheimili Harðar.

Síðan hafur félagsskapurinn vaxið og dafnað. Mikið er lagt í samkomurnar með veglegum kvölverði í uppdekkuðum sal. Listamenn, rithöfundar, einsöngvarar og kórar hafa mætt á samkomurnar og miðlað af list sinni. Harmonika, gítar og söngur eru fastir liðir með hæfilegri blöndu af menningu, list og fræðslu. Haustfagnaðir, aðventukvöld, sögukvöld þar sem menn rifja upp góðar sögur af hestamönnum, kvöld sem tileinkuð eru eftirminnilegum hestamönnum sem sett hafa svip hestasamfélagið, myndakvöld þar sem sýndar eru myndir frá fyrri tíð, bókmenntakvöld þar sem rithöfundar kynna verk sín, reiðtúrar og grillveislur.

Nú síðast var boðið upp á hagyrðingakvöld þar sem hinir landskunnu hagyrðingar séra Hjálmar Jónsson, Ragnar Ingi Aðalsteinsson og Ómar Ragnarsson voru mættir til leiks. Að þessu sinni mættu um eitt hundrað manns á samkomuna. Kom fram í máli formannsins Sigríðar Johnsen að þetta væru lang fjölmennustu samkomur félagsins og ekki einu sinni árshátíð félagsins nái slíkum fjölda hin síðari ár. Það sé því löngu sannað mál að þörfin fyrir þessar samkomur sé ótvíræð. Skemmst er frá því að segja hagyrðingakvöldið tókst með eindæmum vel. Stóðu þremenningarnir vel undir væntingum og gott betur.  

Þá var sá kunni hesta- og fræðimaður Ingimar Sveinsson heiðraðursérstaklega á samkomunni en hann varð níræður nýlega og stundar hestamennsku enn af kappi.

Í dag blandast engum hugur um sem tekið hefur þátt í þessum félagsskap að full þörf hafi verið á að blása til þessa leiks. Spurningin sé hinsvegar sú hvort ekki sé full ástæða fyrir önnur félög að huga að þessum aldurshópi þar sem miðað hefur verið við 60+ hjá Herði. Tekið skal fram að ekki hefur verið nafnskírteinaskylda við innganginn að þessum samkomum en vitað er að borið hefur á því að nokkur „unglömb“ hafi „svindlað“ sér inn á þessa vinsælu mannfagnaði.